Ҷаласаи 38-уми Шӯрои роҳбарони мақомоти амният

Душанбе, 27. 05. 2015. (АМИТ «Ховар», Руқияи Боймамад).- Дар шаҳри Душанбе ҷаласаи 38-уми Шӯрои роҳбарони мақомоти амниятӣ ва хадамоти махсуси давлатҳои узви Иттиҳоди давлатҳои мустақил ба кори худ шуруъ намуд. Дар кори  ҷаласа роҳбарони тамоми сохторҳои  амниятии аъзо, аз ҷумла роҳбарияти Кумитаи иҷроияи иттиҳоди давлатҳои мустақил, масъулин аз Тоҷикистон, Русия, Озарбойҷон, Арманистон, Қазоқистон, Қирғизистон, Малдова,  Беларус ва Узбекистон иштирок намуданд. Дар ҳайати назоратчӣ ҳамчунин намояндагони сохторҳои амниятии Туркманистон, Олмон, Испания Фаронса, Италия иштирок доштанд. 
Масъалаи марказии ҷаласаи навбатии роҳбарони сохторҳои амният ва хадамоти махуси давлатҳои аъзои ИДМ-ин таъмини амният дар минтақа буд. Дар ин раванд масъулин масъалаҳои доғи рӯз, аз ҷумла терроризму экстремизм, нажодпарастӣ, зуҳуроти гуруҳҳои ифротӣ ва дигар проблемаҳои муҳимро мавриди баррасӣ қарор доданд. 
Тавре ки  дар ҷаласа гуфта шуд, бо назардошти хатарҳои ҷаҳони муосир сохторҳои амнияти кишварҳои минтақа ҳамкориро ҷиҳати боз ҳам пурзӯр намудани сарҳади давлатӣ бояд равнақ диҳанд. Таҳлилгарони соҳа  яке аз воситаҳои асосии пурзӯр намудани ҳамкориро дар таъмини бехатарии иттилоотӣ ва пешгирӣ аз ҳаракатҳои террористӣ, эктримистӣ номида,  иброз доштанд,  ки зуҳури ҳаракати экстремистӣ бо номи «Давлати исломӣ» моро водор месозад вазифаи худро босифат ва сари вақт анҷом диҳем. 
Гуфта шуд, ки танҳо маҳз фаъолияти дастаҷамъона ва мубодилаи таҷриба дар ин самт воситаи ягонаи таъмини амнияту оромӣ дар минтақа хоҳад буд.