Ҷавонон- неруи созандаи ҷомеа

 
    Душанбе, 26.05.2015.(АМИТ «Ховар», Марзия Саидзода).- Дар доираи таҷлили «Даҳ рӯзи ҷавонони Тоҷикистон» дар Донишкадаи  идоракунии давлатии назди Президенти Ҷумҳурии Тоҷикистон бо иштироки  роҳбарият ва ҳайати кормандони донишкадаи мазкур, инчунин Кумитаи ҷавонон, варзиш ва сайёҳии назди Ҳукумати ҷумҳурӣ ҷамъомади тантанавӣ доир гардид.
  Дар ҷамъомад Лутфия Абдулхолиқзода, ректори Донишкадаи идоракунии давлатии назди Президенти кишвар, Аҳтам Абдуллозода-раиси Кумитаи ҷавонон, варзиш ва сайёҳии назди  Ҳукумати мамлакат  доир ба сиёсати пешгирифтаи Ҳукумати  Ҷумҳурии Тоҷикистон дар самти баланд бардоштани мавқеъ ва нақши ҷавонон  дар идораи соҳаҳои  гуногуни иқтисодиёти кишвар, таҳкими пояҳои давлатдорӣ, нақши созандагию бунёдкории ҷавонон дар раванди эъмори ҷомеаи дунявию демократӣ тақвияти сулҳу оромӣ ва ваҳдати миллӣ дар кишвар ибрози назар намуданд.
   Зикр шуд, ки Ҳукумати Ҷумҳурии Тоҷикистон дар самти баланд бардоштани мавқеи ҷавонон дар ҷомеа дар тӯли солҳои охир бо таҳияи барномаҳои мукаммали давлатӣ  тадбирҳои муассир меандешанд. 
  Дар фарҷоми ҷамъомад ба ғолибон ва иштирокдорони форумҳо, озмунҳо ва олимпиадаҳои байналмилалию  ҷумҳуриявии донишҷӯёни макотиби олии кишвар ифтихорномаҳо ва дигар туҳфаҳои молию хотиравӣ тақдим шуданд.