Ҷилавгирӣ аз қочоқи «ESSE» аз Афғонистон

Душанбе,19.05.2015.(АМИТ «Ховар», Марзия Саидзода).- Гумрукчиёни тоҷик аз қочоқи 300 баста сигарети тамғаи «ESSE» аз Афғонистон ба Тоҷикистон ҷилавгирӣ карданд.
             Маркази матбуоти  Хадамоти  гумруки Тоҷикистон иттилоъ медиҳад, ки дар дидбонгоҳи гумрукии «Панҷи Поён» ҳангоми азназаргузаронии мошини калони  боркаш, ки мансуб ба як сокини шаҳри Қӯрғонтеппа аст, аз зери  халтаҳои шакар 300 баста сигарети тамғаи «ESSE»-и истеҳсоли Корея дарёфт ва мусодира шуд. Гуфта мешавад, ки номбурда мехост ин миқдор бастаи сигаретро бидуни  барасмиятдарории гумрукӣ ва пинҳонӣ ба қаламрави Тоҷикистон ворид намояд.
 Аз рӯи ин ҳодиса парвандаи ҳуқуқвайронкунии маъмурӣ кушода шуда, тафтиш идома дорад.