30 рӯзи ҷавонӣ барои ҷавонон

Душанбе, 04.05.2015. (АМИТ «Ховар»,  Некрӯзи Муҳаммадсодиқ ).-2 майи соли равон дар доираи чорабиниҳои фарҳангӣ дар Боғи «Ирам» маросими расмии кушодашавии 30 рӯзи ҷавонӣ бахшида ба Рӯзи ҷавонони Тоҷикистон таҳти унвони «Ҷавонон-давомдиҳандагони ҳадафҳои олии кишвар»  доир гардид. Дар он Аҳтам Абдуллозода, раиси Кумитаи ҷавонон, варзиш ва сайёҳӣ кулли ҷавонони мамлакатро бо як моҳи ҷавонон табрик намуд.  Аҳтам Абдуллозода аз дастгириҳои пайвастаи Ҳукумати мамлакат ёдовар гардида, ҷавононро ба меҳанпарастию ифтихори миллӣ ва арҷ гузоштан ба муқаддасоти миллӣ даъват намуд. Таъкид шуд, ки ҷавонон дар маркази таваҷҷуҳ қарор дошта, марҳила ба марҳила шароити зарурӣ барои онҳо муҳайё  мешавад. 
Дар доираи ин чорабинӣ аз ҷониби Кумитаи ҷавонон, варзиш ва сайёҳӣ Амалиёти «Биёед, китоб мехонем!» доир гардида, ба дӯстдорони китоб бештар аз 1000 адад китоби гуногуни бадеӣ ба таври  ройгон тақсим  шуд. 
Ҳамчунин аз ҷониби мақомоти иҷроияи ҳокимияти давлатии шаҳри Турсунзода, Кумитаи кор бо занон ва оила, Вазорати тандурустӣ ва Иттифоқи «Тоҷикматлубот» намоишгоҳи ҳунарҳои дастӣ ва таомҳои миллӣ ташкил шуд, ки сокинону меҳмонони зиёд аз он дидан намуданд.
Лозим ба ёдоварист, ки тибқи нақшаи қабулгардида 30 рӯзи ҷавонӣ бахшида ба Рӯзи ҷавонони Тоҷикистон таҳти унвони «Ҷавонон- давомдиҳандагони ҳадафҳои олии кишвар!» дар давоми 30 рӯз идома ёфта, дар доираи он чорабиниҳои фарҳангию варзишӣ, мулоқоту дидор бо ҷавонон ва озмуну викторинаҳо доир мешаванд.
Дар ин бора ба АМИТ «Ховар» Наврӯз Қурбонов, мутахассиси пешбари Бахши таҳлилу иттилооти Кумитаи ҷавонон, варзиш ва сайёҳӣ хабар дод.