Ба истиқболи ҷашни Ғалаба

Кӯлоб, 6.05.2015.(АМИТ «Ховар», Фарҳоди Мадамин).-Тӯли як ҳафта аст, ки дар тамоми муассисаҳои давлатӣ ва ғайридавлатии шаҳри Кӯлоб Ҳафтаи поси хотир бахшида ба 70- солагии Ғалаба бар фашизми гитлерӣ таҳти унвони «Ҳеҷ кас ва ҳеҷ чиз фаромӯш намешавад» гузашта истодааст. Собиқадорони ҷанг бо тариқи садову симо ва рӯзномаҳо хотироташонро нақл мекунанд. Мақомоти иҷрояи шаҳр, комиссариати ҳарбӣ ва дигар шахсони мутасаддӣ дар арафаи ҷашн ба собиқадорон кумакҳои пуливу молӣ мерасонанд. Аз ҷумла, дар Осорхонаи вилоятии шаҳри Кӯлоб, Донишгоҳи давлатии Кӯлоб, коллеҷҳои тиббиву омӯзгорӣ семинарҳои илмӣ бо иштироки олимону адибон дар мавзӯи «Саҳми тоҷикон дар ғалаба бар фашизм» доир шуданд.  Ҳамзамон барои маърӯзаҳои беҳтарин туҳфаҳои хотиравӣ тақдим гардиданд.  Ҳафтаи ҷашнвора дар манотиқи Кӯлоб идома дорад.