Баррасии масоили муҳоҷират дар Душанбе

   Душанбе, 18.05.2015. (АМИТ  «Ховар», Лайло Тоирӣ).-Тибқи қарори раиси шаҳри Душанбе Маҳмадсаид Убайдуллоев дар бораи баргузории «Рўзҳои шаҳри Душанбе дар ноҳияҳои он» аз 30 апрели соли ҷорӣ сар карда, ҳар ҳафта рўзҳои панҷшанбе «Рўзҳои шаҳри Душанбе дар ноҳияи он» баргузор мегардад.  
Рўзҳои шаҳри Душанбе дар шаҳраку маҳаллаҳои шаҳр тавассути гузаронидани вохўриҳои сокинон бо роҳбарияти шаҳри Душанбе, раисони ноҳияҳои шаҳри Душанбе, роҳбарони мақомоти ҳифзи ҳуқуқи шаҳр, сохторҳои хизматрасонии коммуналӣ, нақлиёти шаҳрӣ ва дигар сохторҳои марбута анҷом дода мешаванд. 
Дар вохўриҳо тибқи «Роҳнамо» асосан масъалаҳои ҳолати санитарию тозагӣ ва экологӣ, ҳолати роҳҳо, риояи талаботи шаҳрсозӣ, хизматрасонӣ, иҷтимоиёт, ҳифзи ҳуқуқ ва дигар масъалаҳои умумӣ дар маҳаллаҳо қаблан санҷидашуда баъдан муҳокимаю арзёбӣ мешаванд.
Бо назардошти ҷадвали баргузории «Рўзҳои шаҳри Душанбе дар ноҳияҳои он» мактуби Раёсати Хадамоти муҳоҷират дар шаҳри Душанбе унвонии раисони шаҳраку маҳаллаҳои ноҳияҳои шаҳри Душанбе фиристода шуд.
Дар мактуб қайд гардид, ки муҳоҷирони меҳнатие, ки  вурудашон ба Федератсияи Русия манъ гардидааст ва хоҳиши кор кардан дар ташкилоту муассисаҳои пойтахтро доранд ё мехоҳанд дар кишварҳои дигари будубош фаъолият намоянд ё ба соҳибкории хурду миёна ва касбомўзӣ машғул шаванд, ба Раёсати Хадамоти муҳоҷират дар шаҳри Душанбе ба суроғаи хиёбони А. Рўдакӣ, 37 муроҷиат намоянд. 
Раёсати Хадамоти муҳоҷират дар шаҳри Душанбе ба онҳо дар ҳалли мушкилоташон мусоидат менамояд ва омодааст бо муҳоҷирони меҳнатӣ вохўрӣ анҷом диҳад.
Дар вохўриҳо сардори Раёсати Хадамоти муҳоҷират дар шаҳри Душанбе  Н. Ғаниев ва дигар кормандони Раёсат иштирок намуда, ба шаҳрвандон дар бораи конунгузории нави муҳоҷират дар Федератсияи Русия, тарзи гирифтани Патент, супоридани тест (имтиҳон) аз забони русӣ, таърих ва асосҳои қонунгузории ФР равшанӣ меандозанд.
 Дар ин бора ба АМИТ «Ховар» сухангӯи Хадамоти муҳоҷирати Вазорати меҳнат, муҳоҷират ва шуғли аҳолии ҷумҳурӣ Абдуллоҳи Қодирӣ иттилоъ дод.