Бойгонии давлатии вилояти Суғд 90-сола шуд

 Хуҷанд, 30.05.2015. (АМИТ “Ховар”, Абдуаҳад Шарифзода).-Шурӯъ аз 9-уми апрели соли 1925  дар қаламрави шимоли Тоҷикистон, уезди Хуҷанд (алъон вилояти Суғд) бо қарори кумиҷроияи уезди Хуҷанд бори аввал дар миқёси ҷумҳурии навтаъсиси худмухтории Тоҷикистон мансаби расмии бойгоничӣ (архивариус) ҷорӣ шуда, баъдан дар ин замина Идораи бойгонии давлатии уезди Хуҷанд низ таъсис шуд. 
Моҳи апрели соли  равон Идораи бойгонии давлатии вилояти Суғд (уезди Хуҷанд) 90 сола шуд. Дар ин замина чанде пеш Қарори раиси вилояти Суғд ҷиҳати дар даҳрӯзаи якуми моҳи июни соли равон таҷлил намудани “90-солагии Бойгонии давлатии вилояти Суғд»  ба тасвиб расид.
Тавре ки аз Идораи бойгонии вилоятӣ иттилоъ доданд, қарори мазкур бо назардошти саҳми кормандони бойгониҳои давлатӣ, байниидоравӣ ва бахшҳои бойгонӣ дар пешбурди кишвар, ҳамчунин мавқеи онҳо дар ҷомеа  қабул шуда, дар доираи таҷлили ҷашн баргузории мулоқоти собиқадорони соҳа бо кормандони бойгониҳои давлативу байниидоравӣ, вохӯрии донишҷӯёни ДДХ ба номи академик Бобоҷон Ғафуров бо собиқадорони бойгонӣ ва гузаронидани як силсила чорабиниҳои оммавию сиёсӣ  ба нақша гирифта шудааст.