Чор голи Манучеҳр Ҷалилов ба дарвозаи КМВА «Помир»
Душанбе, 05.05.2015. (АМИТ “Ховар”, Рафоати Абдулҳамид).- Бозии даври чоруми чемпионати Тоҷикистон байни “Истиқлол” ва КМВА “Помир” бо ғалабаи бузурги чемпиони феълӣ анҷом ёфт. Шогирдони Мубин Эргашев ба дарвозаи мудофиачиён панҷ гол зада, аз дарвозаи худ як гол сар доданд.
Тавре ки сомонаи расмии Федератсияи футболи Тоҷикистон хабар додааст, қаҳрамони бозӣ ҳамлагари “Истиқлол” ва тими мунтахаби миллии кишвар Манучеҳр Ҷалилов шуд.
Манучеҳр дар ин бозӣ ба задани чор гол муваффақ шуда, муаллифи нахустин “Покер” дар чемпионати имсолаи Тоҷикистон шуд. Як голи дигари “Истиқлол”-ро Дилшод Восиев ба самар расонид. Голи престижи мудофиачиёнро Давронҷон Тухтасунов зад. Ҳаминро зикр мекунем, ки голи Тухтасунов аввалин голест, ки дар чемпионати имсола ба дарвозаи чемпиони феълӣ зада мешавад.