Фархор: Аз нақлиёт ҳушёр бошед!

 
Фархор, 26. 05. 2015. (АМИТ «Ховар», Сулаймони Хол).-   Кормандони шуъбаи Бозрасии давлатии атомобилии ноҳияи Фархор  баҳри эмин доштани  бехатарии  воситаҳои  нақлиёт тадбирҳои зарурӣ андешида, дар ин самт  корҳои назаррасеро ба анҷом расониданд. 
Ба қавли  сардори шуъбаи БДА   Шуҳрат Нуралиев дар давоми 4 моҳи соли ҷорӣ кормандон  ронандагони воситаҳои нақлиётеро, ки   қоидаҳои ҳаракати роҳро риоя накардаанд, ба  маблағи 1326 сомонӣ ҷаримабандӣ карданд, ки  аз ин шумора 11 адад дар ҳолати мастӣ ва 3 адад сиёҳшиша  мебошад. Дар ин давра  дар ҳудуди  ноҳия, хушбахтона, садамаи автомобилӣ ба қайд гирифта нашудааст. 
Ба гуфтаи манбаъ   масъулини шуъба  бо соҳаи маориф  ҳамкории зич дошта,  дар  аксари мактабҳои таҳсилоти миёнаи умумӣ бо хонандагон дар мавзӯъҳои « Қоидаи ҳаракат дар роҳ», «Риояи чароғакҳои роҳнамо», «Аз нақлиёт ҳушдор бошед»  вохӯрӣ гузаронида, хонандагонро аз ҳар гуна хатарҳои    нақлиётӣ ҳушдор месозанд.