Хатари терроризму экстремизми байналмилалӣ ба амнияти кишвар

Душанбе, 29. 05. 2015. (АМИТ «Ховар», Мавҷуда Анварӣ).- Чанде пеш дар шаҳри Хоруғ дар мавзӯи  «Хатарҳои терроризм ва экстремизми байналмилалӣ ба амнияти кишвар ва чораҳои пешгирӣ намудани он» конфронси илмӣ-амалӣ баргузор гардид. 
Прокурори вилоят Мироҷиддин Наботов кори конфронсро оғоз бахшида, зикр намуд, ки: «Имрӯз зуҳуроти тундгароӣ ва ифротгароӣ бо ҳамаи оқибатҳои даҳшатбораш ба мушкилоти ҷиддии ҷомеа табдил ёфтааст. Бинобар ин, зарур аст, ки фаъолияти тамоми сохторҳои давлатию ҷамъиятиро барои таъмини боэътимоди сулҳу субот, ҳаёти осоишта ва амнияти кишварамон равона созем».
Раиси ВМКБ Шодихон Ҷамшед иброз дошт, ки имрӯз терроризму ифротгароии диниву сиёсӣ аз доираи зуҳуроти хавфноки давлатию миллӣ баромада, ба хатари вазнини байналмилалӣ табдил ёфтааст. Гаравидани ҷавонон ба ҳизбу ҳаракатҳои ифротгароёна ва террористӣ солҳои охир вусъат гирифта, ба як равияи хатарафзои сайёра тавассути роҳандозии амалиёти ҳаросафкан, исёнҳои мусаллаҳона, бо роҳи зӯрӣ ғасб намудани ҳокимият, барҳам додани сохти конститутсионӣ, истиқлолият ва тамомияти арзии давлатҳо табдил ёфта истодааст.
Раиси вилоят аз он изҳори нигаронӣ намуд, ки ин падидаҳои номатлуби  хатарафзо ба Тоҷикистони соҳибистиқлол низ таҳдид мекунад. Имрӯз аз рӯи маълумоти мақомоти қудратӣ тақрибан 350 нафар шаҳрванди Тоҷикистон ба гурӯҳҳои террористӣ шомил шуда, дар давлатҳои Сурияю Ироқ ҷангида истодаанд, ки 60 нафари онҳо аллакай ҷони хешро аз даст додаанд. Мутаассифона, 60 нафар зодагони ВМКБ низ ба ин гурӯҳҳо  шомиланд ва шаш нафарашон ҳалок шудаанд. Мақсади ҷамъомади имрӯзаро Шодихон Ҷамшед дар баррасии масъалаи амнияти минтақа, сарҳад ва шомилшавии ҷавононро ба ҳизбу ҳаракатҳои террористиву ифротгароӣ, иштироки онҳо дар ҷангҳои дигар кишварҳо арзёбӣ намуд. 
Нусратулло Мирзоев, сардори Раёсати КДАМ ҶТ дар вилоят оид ба сабабу омилҳои гаравидани ҷавонон ва наврасон ба созмонҳои экстремистию террористӣ, таъсири чунин падидаҳои номатлуб ба раванди сулҳу субот ва вазъи сиёсии Ҷумҳурии Тоҷикистон, Искандарзода Абдулваҳҳоб Мансур, сардори Раёсати ВКД ҶТ дар вилоят оид ба ошкоркунии ҷиноятҳои экстремистию террористӣ бо далелҳои боэътимод ҳарф заданд. 
Сипас, иштирокдорон филми мустанади телевизионии «Тақдири гумроҳон»-ро ки оид ба кирдорҳои разилонаи террористону ифротгароён омода шудааст, тамошо карданд.