Исфара: Навсозии мактаб барои беш аз 600 хонанда

Душанбе, 26.05.2015 (АМИТ «Ховар», Фарзонаи Давлат).-Сафири ИМА дар Тоҷикистон Сюзан М. Эллиотт дар маросими ифтитоҳи ошёнаи сеюми таъмиршудаи мактаби миёнаи рақами 39-и ноҳияи Исфараи вилояти Суғд иштирок намуд.
Тавре ки дар ин бора аз сафорати ИМА дар Тоҷикистон хабар доданд, сафорати мазкур бо роҳбарияти ноҳияи Исфара дар масъалаи таъмири мактаби миёнаи рақами 39 ва барои таъмини кӯдакон бо имкониятҳои беҳтари донишомӯзӣ ҳамкории зич дошта, ошёнаи сеюми таъмиршуда ғунҷоиши мактабро афзун хоҳад кард. Ин таъмир ба талабагон имконияти хондани дарс дар синфхонаҳои босифатро медиҳад.
Гуфта мешавад, мактаби миёнаи рақами 39 аз 30 синфхона иборат буда, дар он 642 хонанда таҳсил мекунад. Қисми таъмиршуда пурра бо мизҳои дарсӣ ва тахтаҳои синфӣ таъмин шудааст. 
Ёдрас мешавем, ки гурӯҳ оид ба корҳои шаҳрвандии Сафорати ИМА, ки барои рушди маорифу тандурустӣ кумак мерасонад, лоиҳаи мазкурро маблағгузорӣ намудааст.