Иштироки 12 нафар дар Олимпиадаи донишҷӯён

Душанбе, 5.05.2015. (АМИТ «Ховар», Раъно Нусратуллозода).-Дар даври хотимавии олимпиадаи донишҷӯёни муассисаҳои таҳсилоти олии касбии Ҷумҳурии Тоҷикистон, ки   7-8 май дар Донишкадаи молия ва иқтисоди Тоҷикистон гузаронида мешавад, 12 нафар донишҷӯи Донишгоҳи давлатии Хуҷанд ба номи академик Бобоҷон Ғафуров ширкат хоҳанд намуд. Дар ин бора сардори раёсати таълими донишгоҳ Саидқаҳҳор Ёқубов иттилоъ дод. 
Манбаъ афзуд, ки 12 нафар донишҷӯ аз 16 факултаи донишгоҳ интихоб гардида, дар даври хотимавии олимпиадаи донишҷӯёни муассисаҳои таҳсилоти олии касбии Ҷумҳурии Тоҷикистон аз рӯи равияҳои  фанҳои забон ва адабиёти тоҷик, забони англисӣ, забони русӣ, технологияи инфарматсионӣ, таърихи халқи тоҷик, математика, физика, химия, биология — экология, назарияи иқтисодӣ, фалсафа ва сиёсатшиносӣ  иштирок хоҳанд намуд. Донишҷӯёнро дар ин даври олимпиада   8 нафар устоди варзида роҳбаладӣ менамояд.