Иштироки «Баҳористон» дар чорабиниҳо бахшида ба Рӯзи ҷавонон

Душанбе, 26.05.2015. (АМИТ «Ховар»).- Чанде  пеш  дар  Қасри «Арбоб» —  и  ноҳияи Бобоҷон  Ғафуров  бахшида ба Рӯзи  ҷавонон маросими ботантана  баргузор  шуд.
Раёсати ҷавонон,  варзиш  ва  сайёҳии Мақомоти   давлатии  ҳокимияти иҷроияи  вилояти  Суғд  дар  ҳошияи  ин  чорабинӣ   намоишгоҳи   дастовардҳои  соҳаҳои  хоҷагии  халқро  доир  намуд, ки дар  он  осоишгоҳи «Баҳористон» иштирок  дошт. 
Раиси  вилояти  Суғд  Абдураҳмон  Қодирӣ  зимни   шиносоӣ  бо  намоишгоҳ  ба  дастовардҳои осоишгоҳи «Баҳористон»  дар  амри ҷалби сайёҳони  хориҷӣ ба  Тоҷикистон  ва  шароити истироҳату  муолиҷа дар  он таваҷҷуҳ  зоҳир намуд. 
Раиси  вилоят  изҳор  дошт, ки ҷавонон  дар ҷаҳони  имрӯза  қувваи  бузурги ҳаракатдиҳандаю  бунёдкорӣ ба шумор  мераванд. «Ҳукумати  Тоҷикистон ба таълиму тарбия ва  ташаккули  наврасону  ҷавонон таваҷҷуҳи  хоса  зоҳир  намуда,  барои  таҳсили онҳо  дар донишкадаҳои беҳтарини  кишвар ва  хориҷа   шароити  зарурӣ  фароҳам  меорад», —  зикр  намуд Абдураҳмон  Қодирӣ.