Иштироки беш аз 15 ҳазор сокини Хуҷанд дар дави миллӣ

Хуҷанд, 18.05.2015. (АМИТ “Ховар”, Абдуаҳад Шарифзода).-Дар Рӯзи дави миллӣ, ки 17 май дар ҷумҳурӣ доир гашт, аз ҷумла дар шаҳри Хуҷанд беш аз 15 ҳазор нафар иштирок намуд. Раиси вилоят Абдураҳмон Қодирӣ барои иштирок дар дави миллӣ  сараввал ба мавзеи варзишгоҳи марказии «20 — солагии Истиқлолияти Тоҷикистон» ташриф оварда,  нахуст дар майдони чавгони шаҳри Хуҷанд, воқеъ дар паҳлӯи варзишгоҳи мазкур аз бозии миёни ду дастаи чавгонбозон дидан намуд. 
Абдураҳмон Қодирӣ дар мавзеи ба номи Исмоили Сомонии шаҳри Хуҷанд ҳозиринро бо оғози чорабинии ҷумҳуриявии варзишӣ — Рӯзи дави миллӣ табрик намуда, изҳор дошт, ки имрӯзҳо барои рушди соҳаҳои гуногуни варзиш аз ҷониби Ҳукумати Ҷумҳурии Тоҷикистон таваҷҷуҳи махсус зоҳир шуда, ҳамасола теъдоди зиёди иншооти варзишӣ ба истифода дода мешавад.
Чорабинии варзишӣ аз майдони Исмоили Сомонӣ оғоз ёфта, ба воситаи кӯчаи Сирдарё то назди Парчами давлатии Ҷумҳурии Тоҷикистон, воқеъ дар хиёбони ба номи Раҳмон Набиев идома ёфт. Дар анҷоми чорабинӣ ба 45 нафар ғолиби нахустдав туҳфаҳои мақомоти иҷроияи ҳокимияти давлатии вилоят супорида шуданд.