Кӯчае дар Истаравшан номи Аҳрор Мухторовро гирифт

Душанбе, 29.05.2015. (АМИТ «Ховар», Ситораи Боймурод).- Тибқи иттилои хадамоти матбуоти раиси вилояти Суғд дар шаҳри Истаравшан яке аз кӯчаҳои марказии шаҳр ба номи иштирокчии Ҷанги Бузурги Ватанӣ, академики Академияи илмҳои Ҷумҳурии Тоҷикистон, доктори илми таърих, профессор Аҳрор Мухторов номгузорӣ шуда,  дар саргаҳи он лавҳаи ёдгорӣ насб гардид.
Гуфта мешавад, ки академик Аҳрор Мухторов тамоми умри пурбаракати худро ба илми тоҷик бахшида, беш аз 80 китоб ва рисолаи илмиву таълимӣ дар соҳаҳои катибашиносӣ, таърихи фарҳанг, таърихи асрҳои миёна ва ҳамчунин адабиётшиносӣ эҷод намуда, дар рушди илми тоҷик саҳми арзанда гузоштааст. Яке аз дастовардҳои муҳими олим бозёфти сангнавиштае бо дасти Бобур аз деҳаи Оббурдони Мастчоҳи Куҳӣ мебошад. Ин бозёфт имрӯз Осорхонаи таърих, этнография ва бостоншиносии Институти таърихи Академияи илмҳои Ҷумҳурии Тоҷикистонро зиннат медиҳад.