Конфронс бахшида ба Иди Ғалаба

Душанбе, 6.05.2015.(АМИТ «Ховар», Раъно Нусратуллозода).- Бо ибтикори Раёсати Академияи илмҳои Ҷумҳурии Тоҷикистон ва Институти таърих, бостоншиносӣ ва мардумшиносии ба номи Аҳмади Дониши Академияи илмҳои Ҷумҳурии Тоҷикистон имрӯз дар  Академияи илмҳои Ҷумҳурии Тоҷикистон ба муносибати 70-умин солгарди Ғалаба дар Ҷанги Бузурги Ватании солҳои 1941-1945 конфронси илмӣ-амалӣ таҳти унвони «Тоҷикистон дар давраи Ҷанги Бузурги Ватанӣ (1941-1945)» доир гардид.
Тавре ки котиби матбуоти АИ ҶТ Латиф Латифов  иттилоъ дод,  президенти Академияи илмҳои Ҷумҳурии Тоҷикистон Фарҳод Раҳимӣ  ҳозиринро ба 70-умин солгарди ғалаба бар фашизм самимона шодбош гуфта, аз далерию корнамоиҳои ҷанговарони тоҷик сухан гуфт. 
Дар конфронс олимони таърихшинос академик Раҳим Масов, номзадҳои илми таърих Абдулло Ғафуров, Намоз Ҳотамов, Рақиб Абдулҳаев, Ваҳҳоб Набиев, Баҳринисо Қобилова, Насрулло Убайдуллоев, намояндаи Сафорати Русия дар Тоҷикистон маърӯзаҳои илмӣ намуданд.
Дар анҷоми конфронс рӯнамоии филми ҳуҷҷатии «Сарбозони бесилоҳ», ки бо ташаббуси Академияи илмҳои Ҷумҳурии Тоҷикистон таҳия шудааст, доир гардид. Филми мазкур ба корнамоии халқи тоҷик дар давраи Ҷанги Бузурги Ватанӣ дар ақибгоҳ бахшида шудааст.