Корҳои фардӣ бо усули «Хона ба хона»

Душанбе, 08.05.2015. (АМИТ  «Ховар», Лайло Тоирӣ).- Миллати тоҷик дар ташаккул ва пойдории оила ва муносибатҳои оилавӣ мактаби худро дорад. Дар тарбияи фарзандон, дар хонадор намудани ҷавонон, дар сохтани муносибатҳо байни аъзои оила фарҳанг ва анъанаи худро дорост. Хусусан шахсони рӯзгордида ва таҷрибадор метавонанд фарҳангу анъанаи хуби рӯзгордориро ба оилаҳои ҷавон нишон диҳанд ва дар пешгирӣ ва рафъи мушкилоту нофаҳмиҳо ба таври дастаҷамъӣ саъю кӯшиш намоянд.
Кумитаи кор бо занон ва оилаи назди Ҳукумати Ҷумҳурии Тоҷикистон бо мақсади омӯзиши сатҳи иҷтимоии оилаҳо, пешгирии ҳолатҳои номатлуб ва дар сатҳи зарурӣ ташкил намудани чорабиниҳои «Соли оила» корҳои фардиро бо оилаҳо аз рӯи усули «Хона ба хона» ба роҳ мондааст.
Шуъбаи кор бо занон ва оилаи мақомоти иҷроияи ҳокимияти давлатии ноҳияи Рӯдакӣ аз ҳисоби раисони шӯроҳои занони ҷамоатҳои шаҳраку деҳот, сарварони мактаб, раисони шӯроҳои духтарони муассисаҳои таълимӣ, гуруҳҳо ташкил карда, корҳои фардиро бо оилаҳо аз рӯи усули «Хона ба хона» ба роҳ монда,дар ҷамоатҳои деҳоти Чимтеппа, Гулистон, Сарикиштӣ, Чоргултеппа шаҳраки Сомониён корҳои фаҳмондадиҳӣ гузарониданд.
Бино ба иттилои Кумитаи кор бо занон ва оила чунин усул дар дигар шаҳру ноҳияҳо низ гузаронида мешаванд.