Марафони хайриявӣ барои муолиҷаи кӯдакони бемории дил

Хуҷанд, 30.05.2015. (АМИТ “Ховар”, Абдуаҳад Шарифзода).-30 май дар маркази Суғд-шаҳри Хуҷанд марафони хайриявии якрӯза таҳти шиори “Бетараф набош” баргузор  мешавад. Чорабинии мазкур аҳамияти ҷумҳуриявӣ дошта,  бо ташаббус ва ибтикори  Фонди хайриявии “Дили кӯдак”  рӯи кор омада, ҳадафи он ҷамъоварии маблағи хайриявӣ  аз ҷониби сокинон буда,  баъдан дар ин замина гузаронидани амалиёти ҷарроҳӣ ба беморон, аз ҷумла кӯдакони дорои бемории дил мебошад. 
Инчунин аз 26 то 31 май дар шаҳри Хуҷанд  бо ташаббуси Маркази иҷтимоиву ҳуқуқии “Сарчашма”  бо ҳамдастии  ТВ “Симои мустақили-1”-и  маркази вилоят  боз як марафони хайриявӣ  таҳти унвони “Хушбахтиро ҳадя кун”  ҷараён дорад.
Иқдоми мазкур  ба Рӯзи ҷаҳонии ҳифзи кӯдакон бахшида шуда, ҳадафи асосии он  ҷамъоварии  бозичаҳои кӯдакона  ба ҳисоб рафта, туҳфаҳои ҷамъоваришуда  1 июн аз ҷониби масъулин ба кӯдакони  оилаҳои ниёзманд тақдим мешаванд.