Муҳоҷири бемор ба Ватан фиристода шуд

Душанбе, 22.05.2015. (АМИТ «Ховар», Лайло Тоирӣ).- Бо мусоидати намояндагии Вазорати меҳнат, муҳоҷират ва шуғли аҳолии ҶТ дар ФР оид ба муҳоҷират шоми 20 май муҳоҷири меҳнатӣ Очилов Абдунабӣ Расулович тавассути ҳавопаймои хатсайри «Самара Хуҷанд» ба Ватан фиристода шуд.Назар ба иттилои сухангӯи намояндагӣ Иброҳим Аҳмадов, як рӯз пештар сокини 40 солаи шаҳри Исфара дар аризааш унвонии корманди намояндагӣ хоҳиш намуда буд, ки барои баргаштан ба Ватан ба вай ёрӣ расонанд. А.Очилов зимни суҳбат бо корманди мақомоти муҳоҷирати Тоҷикистон изҳор дошт, ки аз ин пеш дар ширкати сохтмонии «Росэкспорт» — и шаҳри Самара кор мекард. Вале бинобар бад шудани вазъи саломатиаш вақтҳои охир бекор буда, барои баргаштан ба Ватан маблағу имконият надорад.«Ҳамдиёрони мо дар Русия анъанаи неке доранд, ки дар вазъияти мураккаб ба якдигар дасти ёрӣ дароз кунанд. Коргарони бозори «Кировский» — и шаҳри Самара ба муҳоҷири бемори меҳнатӣ ёрии молиявӣ расонида, барои бозгашти ӯ ба Ватан чиптаи тайёра хариданд», — гуфт Иброҳим Аҳмадов.