Муаррифии дастовардҳои фарҳангии Туркманистон

Душанбе, 13.05.2015.(АМИТ «Ховар», Марзия Саидзода).- Дар доираи ҳафтаи дӯстии мардумони тоҷику туркман дар Душанбе бо ибтикори Сафорати Туркманистон дар Тоҷикистон дар ҳамкорӣ бо Вазорати фарҳанги Тоҷикистон барномаи консертии устодони санъати Тоҷикистону Туркманистон ва намоиши ҳунарҳои мардумии халқи туркман доир гардид. Аз Сафорати Туркманистон ба АМИТ «Ховар» иттилоъ доданд, ки ин чорабинии фарҳангӣ дар доираи таҷлили 20-умин солгарди бетарафӣ ихтиёр кардани Туркманистон созмон дода шуда, он дар таҳкими ҳамкориҳои мутақобилан судманди ду кишвари дӯсту бародар — Тоҷикистону Туркманистон нақши муассир хоҳад гузошт. Дар чорабинии фарҳангӣ ҳамзамон китобҳои Президенти Туркманистон Қурбонгулӣ Бердимуҳаммадов, осори шоирони классик ва муосири Туркманистон, инчунин китобу маҷаллаҳои мухталиф, ки муаррифгари таърих, фарҳанг, табиат ва ҳаёти муосири ин кишвари Осиёи Марказист, ба намоиш гузошта шуданд.