Муаррифии китоби хотироти ҷанговарон дар КМТ

Душанбе, 8.05.2015. (АМИТ “Ховар”, Ситораи Боймурод).- Тибқи иттилои сомонаи расмии Китобхонаи миллии Тоҷикистон, дирӯз дар остонаи таҷлили  70-умин солгради пирӯзӣ дар Ҷанги дуюми ҷаҳонӣ бо талоши генерал Абдулло Ҳабибов ва рӯзноманигор Раҷаби Мирзо китоби хотироти ҷанговарон аз пойтахти кишвар бо номи “Аскарони ғалаба” бо ҳузури густардаи хонандагон дар Китобхонаи миллӣ муаррифӣ шуд.
Гуфта мешавад, ки китоб хотираи беш аз 90 ҷанговар, фотеҳони ҷангро гирд овардааст. Пирони нуронӣ, ки ҳар кадом акнун дар остонаи баҳори 90-уми умр қарор доранд, лаҳзаҳои хонданиву шуниданиеро аз он рӯзгори басо мудҳиш ҳикоят кардаанд.  
 Ҳамчуноне муаллифон дар муқаддимаи китоб овардаанд, аз санаи Ғалабаи халқи шўравӣ дар Ҷанги дуюми ҷаҳонӣ ҳар қадар дуртар равем, ҳамон қадар қаҳрамониҳои онон шоҳидони даҳшатҳои он рўзҳои наҳс ҳам, мутаассифона камтар мегардад. Аз тарафи дигар, насли оянда бояд ин пораи даҳшатноки таърихро ҳамеша дар ёд дошта бошаду аз он хулосаи зарурӣ барорад.