Мулоқот бо муҳоҷирони меҳнатӣ

Душанбе, 04.05.2015. (АМИТ «Ховар», Лайло Тоирӣ).-  Кормандони Намояндагии  Вазорати  меҳнат,  муҳоҷират  ва   шуғли  аҳолии Тоҷикистон  бо  супориши Вазорати  меҳнат,  муҳоҷират  ва   шуғли  аҳолии  ҶТ бо  шароити  кор ва  зиндагии  муҳоҷирони  меҳнатӣ —  шаҳрвандони  Тоҷикистон, ки дар  хоҷагиҳои  парвариши   сабзавоти Ҷумҳурии Бошқирдистон   кор  мекунанд,  шинос  шуданд. 
Назар  ба  иттилои  котиби  матбуоти Намояндагии Вазорати  меҳнат,  муҳоҷират ва  шуғли  аҳолии Тоҷикистон  Иброҳим  Аҳмадов, Агентии  ба кор таъминкунанда дар хориҷи Вазорати  меҳнат,  муҳоҷират ва  шуғли  аҳолии  ҶТ  80  нафар   шаҳрвандони  Тоҷикистон дар  хоҷагии  кишоварзии «Идел» — и ноҳияи Кушнаренко  бо  кор  таъмин  карда шуданд.
Зимни  суҳбат  бо  муҳоҷирони  меҳнатӣ  маълум  шуд, ки  ҳамаи  онҳо  дар  асоси қонун  кор  карда,   бо  манзил ва  хӯроки  севақта таъмин  шуда,  музди  меҳнаташон  сари  вақт  пардохта  мешавад. 
Ба  гуфтаи  роҳбари хоҷагии  мазкур  Илдус  Шокиров,  музди  меҳнати  якмоҳаи  ҳар  коргар то 30  ҳазор  рублро ташкил  медиҳад. 
Ёдовар  мешавем, ки  чанде  пеш думаи  вилояти  Воронеж  пешниҳод  карда буд, ки  муҳоҷирони  меҳнатии  бахши  кишоварзӣ  аз  имтиҳоноти  забони русӣ,  асосҳои  қонунгузорӣ ва  таърихи  Русия, ки  ҳангоми  гирифтани   патентҳо  заруранд,  озод  карда  шаванд.