Мушкилоти нашъамандӣ дар Тоҷикистон

Душанбе, 15. 05. 2015. (АМИТ «Ховар», Мавҷуда Анварӣ).-Дирӯз дар Агентии назорати маводи нашъаовар мизи мудаввар оид ба мушкилоти нашъамандӣ дар Тоҷикистон баргузор гардид, ки дар кори он намояндагони идораҳои давлатӣ, байналмиллалӣ ва ташкилотҳои ғайриҳукуматӣ ширкат варзиданд. 
Мақсади асосии баргузории ин нишаст пурзӯр намудани ҳамоҳангӣ ва тақвияти фаъолияти идораҳои давлатӣ, ташкилотҳои байналмиллалӣ ва ғайриҳукуматӣ, ки дар соҳаи коҳиши зарар, табобат ва пешгирии нашъамандӣ дар ҷумҳурӣ фаъолият доранд, мебошад.
Муовини директори агентӣ М. Хайдарзода зикр намуд, ки самти сиёсии ҳукумати кишвар ба пурзӯр намудани назорати маводи нашъадор, созмон додани заминаҳои ҳуқуқӣ, мустаҳкам намудани иқтидори мақомоти ҳифзи ҳуқуқ ва сохторҳои қудратӣ нигаронида шудааст. Вобаста ба ин зарур аст, ки фаъолияти сохторҳои байналмиллалӣ, ҷамъиятию давлатӣ оид ба пешгирӣ, табобат ва офиятбахшии нашъамандӣ дар ҳамбастагӣ бо самтҳои нав дар ин соҳа тақвият бахшида шавад.
Дар  мизи мудаввар ҳамчунин масъалаҳои дастовардҳо ва дурнамои «Стратегияи миллии мубориза бар зидди гардиши ғайриқонунии маводи мухаддир дар ҶТ барои солҳои 2013-2020», усулҳои табобати истеъмолкунандагони маводи нашъадор дар Тоҷикистон, натиҷаҳои тадқиқот оид ба арзёбии маблағгузорӣ ва дастрас будани хизматрасониҳо ва коҳиши зарар дар ҶТ, тарзу усулҳои табобати нашъамандон дар ҷои маҳрумӣ аз озодӣ баррасӣ гардиданд.