Мусодираи 32 кг героин дар Афғонистон

Душанбе, 20.05.2015. (АМИТ «Ховар»).- Ба кормандони Агентии назорати маводи нашъаовари назди Президенти ҶТ хабаре расид, ки сокини вилояти Бадахшони Ҷумҳурии Исломии Афғонистон ба интиқоли маводи мухаддир аз Афғонистон ба Тоҷикистон машғул аст. Ин хабар фавран ба маълумоти Вазорати корҳои дохилии Афғонистон расонида шуд. Раёсати мубориза бо маводи мухаддири Вазорати корҳои дохилии Афғонистон тасмим гирифт, ки дар ҳудуди деҳаи Оббараки вулусволии Арғуи вилояти Бадахшон амалиёти фаврӣ роҳандозӣ шавад. Дар ҷараёни амалиёт аз манзили сокини зикршуда 32 килограмм героин пайдо ва мусодира гардид. Алҳол соҳиби героин дастгир ва аз рӯи ин қазия парвандаи ҷиноятӣ кушода шудааст. Ҳамзамон барои муайян ва дастгир шудани аъзои боқимондаи гурӯҳе, ки ба гардиши ғайриқонунии маводи мухаддир машғул аст, чораҳои амалӣ дида мешаванд.Дар натиҷаи амалиёти навбатии муштараки мақомоти зидди маводи мухаддири Ҷумҳурии Тоҷикистон ва Ҷумҳурии Исломии Афғонистон фаъолияти ғайриқонунии боз як гурӯҳи ҷинояткор дар қаламрави Афғонистон ҷилавгирӣ шуд.