Офати табиӣ ба ноҳияи Кубодиён зарари иқтисодӣ расонид

Душанбе, 12.05.2015. (АМИТ  «Ховар», Лайло Тоирӣ).- Тавре ки  аз маркази матбуоти Кумитаи  ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон хабар доданд, 11-уми майи соли 2015 соати 17:30 дақиқа дар натиҷаи боридани борони бошиддат ва омадани сел дар ҷамоати деҳоти ба номи «Утақара Назаров» деҳаҳои Бошқалъа ва Чапари 2-и ноҳияи Қубодиён тахминан ба 300 га замини кишоварзии ноҳия зарари иқтисодӣ расид.
Дар айни ҳол дар ҷои ҳодиса сардори Ситод оид ба ҳолатҳои фавқулода ва мудофиаи граждании вилояти Хатлон Ҳотамшоҳ Шарифов бо ҳайати комиссияи ҳолатҳои фавқулодаи ноҳия фаъолият намуда, маблағи зарари расонидашударо муайян намуда истодаанд.
           Бино ба гуфтаи котиби матбуоти кумита Ориф Нозимов дар ҷамоати деҳоти «Қизил-қалъа»-и деҳаи Меҳнатободи     ноҳияи Хуросон ба заминҳои наздиҳавлигии шаҳрвандон обу лойқа даромада ва як хонаи истиқоматии шаҳрванд Сулаймонқул Алиев пурра вайрон гаштааст.Талафоти ҷонӣ ба қайд гирифта нашудааст. 
            Бояд зикр кард, ки дар ноҳияҳои мазкур, комиссия оид ба ҳолатҳои фавқулода фаъолият дошта, ин ба ҳолатҳои фавқулодаи минтақавӣ шомил мебошад ва бо қувва ва маблағҳои мақомоти иҷроияи ҳокимяти давлатии вилоят бартараф мешавад.