Озмун бахшида ба Рӯзи ҷавонон

 
Душанбе, 07.05.2015. (АМИТ “Ховар”, Фарзонаи Давлат).-Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон бо мақсади баланд бардоштани маърифати фарҳангии ҷавонон, инкишофи ҳисси ватандӯстӣ, мусоидат ва тавсеа бахшидани эҳсоси  худшиносӣ, садоқат ба Ватан, арҷгузорӣ ба таърих ва тамаддуни халқи тоҷик, ҳифзи арзишҳои миллӣ ва дастовардҳои истиқлолият, муаррифии  дастовардҳои ҷавонони соҳибистеъдод ва дастгирии бештари онҳо дар нақшаи чорабиниҳои “30 рӯзи ҷавонӣ” бахшида ба Рӯзи ҷавонони Тоҷикистон озмуни ҷумҳуриявии иншои беҳтарин таҳти унвони “Ҷавонон давомдиҳандагони ҳадафҳои олии кишвар!”,дар мавзуи «Дастовардҳои ҷавонони даврони соҳибистиқлол» ва мусаввирони ҷавон зери унвони “Тоҷикистон — кишвари ман ” миёни муҳассилини муассисаҳои таҳсилоти миёнаи умумӣ ва махсуси касбии мамлакат ва дигар наврасону ҷавонони соҳибистеъдод эълон менамояд. 
Ҳамаи ҷавонони хоҳишманд метавонанд дар озмун ширкат варзанд. Ғолибону иштирокчиёни фаъоли озмунро диплому сипоснома ва туҳфаҳои хотиравӣ интизор аст.