“Падар, модар ва ман — оилаи варзишгар”-озмун

Қайроққум, 26.05.2015. (АМИТ “Ховар”, Абдуаҳад Шарифзода).-Дар шаҳру ноҳияҳои шимоли кишвар дар доираи эълони соли 2015 — соли оила  чорабиниҳои мухталиф доир гардида истодаанд. Тавре ки аз шуъбаи кор бо занон ва оилаи мақомоти вилоятӣ иттилоъ доданд, дар ҳамаи шаҳру ноҳияҳои вилоят чорабиниҳо таҳти унвони  «Оила — эҳёгари анъанаҳои миллӣ» ҷараён доранд. 
Ҳамзамон дар ин радиф баҳри тарғибу ташвиқи  тарзи ҳаёти солим  ва ҷалби ҳарчи бештари оилаҳо ба варзиш низ як силсила чорабиниҳои варзишии оммавӣ бо номи “Варзиш — асоси солимии оила” низ ҷараён доранд. 
Бахшида ба Соли оила ва таҷлили Рӯзи ҷавонон  бо ибтикори мақомоти маҳаллии шаҳри Қайроққум ва бахши кор бо занон ва оилаи шаҳр  дар ҳамкорӣ бо бахши ҷавонон, варзиш ва сайёҳии шаҳр дар толори варзишии «Истиқлол»-и шаҳр  бо иштироки намояндагони корхонаву муассисаҳо ва ҷамоатҳои шаҳракҳо  озмуни шаҳрии  «Падар, модар ва ман — оилаи варзишгар» гузаронида шуд. Дар интиҳои  мусобиқа  ғолибон ва иштирокчиёни фаъол  бо туҳфаҳои хотиравии  мақомоти маҳаллӣ  сарфароз гардиданд.