Пешгирии падидаҳои номатлуб байни ҷавонон

Душанбе, 08.05.2015. (АМИТ  «Ховар», Лайло Тоирӣ).- Бахшида ба таҷлили Соли оила бахши кор бо занон ва оилаи мақомоти иҷроияи ҳокимияти давлатии ноҳияи Фирдавсии шаҳри Душанбе дар якҷоягӣ бо бахши ҷавонон, варзиш ва сайёҳӣ, намояндаи Агентии назорати маводи нашъаовари назди Президенти Ҷумҳурии Тоҷикистон ва сохторҳои дахлдор дар шаҳраки 23-и ноҳияи Фирдавсӣ байни занону ҷавонон вохӯрӣ гузаронид. Ҳадаф аз ташкили вохӯрӣ ин пешгирии падидаҳои номатлуб ва ифротгароӣ байни ҷавонон, тарбияи дурусти фарзандон дар руҳияи ватандӯстию ифтихори миллӣ, пешгирии вайроншавии оилаҳои ҷавон, авҷ гирифтани тақлиду бегонапарастӣ, фарҳангӣ либоспӯшӣ, нигоҳ доштани фарҳангу тамаддуни миллӣ буд.
Зимни вохӯрӣ мудири бахши кор бо занон ва оилаи ноҳия Зӯҳро Асророва оид ба маданияти шаҳрдорӣ, риоя намудани талаботи қоидаҳои тартиботи ҷамъиятӣ ва ободонӣ, пешгирии оилавайронӣ, косташавии тарбия дар оила ва дар руҳияи хештаншиносӣ тарбия намудани фарзандон, пешгирии зӯроварӣ дар оила, никоҳҳои хешутаборӣ, даъват намудани ҷавонон ба сафи Қувваҳои мусаллаҳ сухан гуфт.
Дар ин бора ба АМИТ «Ховар» аз Кумитаи кор бо занон ва оилаи назди Ҳукумати ҶТ хабар доданд.