Пешгирии пайовардҳои коррупсия

Душанбе, 28. 05. 2015. (АМИТ «Ховар», Мавҷуда Анварӣ).-Вохӯрии навбатии намояндагони Агентии назорати давлатии молиявӣ ва мубориза бо коррупсияи Ҷумҳурии Тоҷикистон бо аҳли кормандони Кумитаи давлатии сармоягузорӣ ва идораи амволи давлатии кишвар, дар асоси «Стратегияи муқовимат бо коррупсия дар Ҷумҳуриии Тоҷикистон барои солҳои 2013-2020», доир ба таҳлили хавфҳои коррупсия, роҳ надодан ва пешгирӣ намудани омилҳои коррупсионӣ, фаҳмондадиҳии хавфҳои коррупсия ва дарки зарару оқибатҳои ногувори он, масъалаҳои қонунгузории зиддикоррупсионӣ ва дар амал татбиқ намудани он доир гардид. 
Маркази матбуоти Агентии назорати давлатии молиявӣ ва мубориза бо коррупсия мақсади гузаронидани чунин вохӯриҳоро пешгирии пайовардҳои ин зуҳуроти номатлуб, ки дар рушди кишвари соҳибистиқлоламон монеаҳоро эҷод мекунад, арзёбӣ намуд. 
Дар вохӯрӣ кормандони Кумитаи давлатии сармоягузорӣ ва идораи амволи давлатии ҶТ ба кормандони Агентии назорати давлатии молиявӣ ва мубориза бо коррупсия ҷиҳати пешгирӣ ва мубориза бо ин падидаи номатлуб, ки ҳамчун зуҳуроти хатарноки ҷаҳони муосир ном гирифтааст, таклифҳои судманд пешниҳод намуданд.