Рӯзи дави миллӣ муайян гардид

 
Душанбе, 08.05. 2015. (АМИТ “Ховар”, Фарзонаи Давлат).-Имсол дар  Тоҷикистон Рӯзи  дави  миллӣ, ки ҳамасола дар ҳошияи Рӯзи ҷавонони  Тоҷикистон  дар  саросари  кишвар   роҳандозӣ  мешавад, 17 май  баргузор  мешавад.
Дар ин чорабинии ҷумҳуриявӣ дар  шаҳри  Душанбе  иштирокдорони  дав  мусобиқаро  аз маҳаллаи  «Чорбоғ» — и ноҳияи Варзоб  оғоз  намуда, онро  дар «Наврӯзгоҳ» —  и  пойтахт  анҷом  медиҳанд. 
Иштироккунандагони  дави  миллӣ аз рӯи  анъана  масофаҳои 3,5 ва 10  километрро тай  мекунанд.  Дар дави  миллӣ  намояндагони  ҳамаи  гурӯҳҳои  аҳолӣ  аз роҳбарони  вилояту  ноҳияҳо то кӯдакони  хурдсол иштирок  намуда, ғолибони  он бо мукофотҳо  қадрдонӣ  мешаванд.
Ёдрас мешавем, ки  дави  миллӣ бо дастури Президенти  Тоҷикистон  сар  аз соли 2007  ҳамасола моҳи  май  дар  ҳамаи  шаҳру ноҳияҳои кишвар баргузор  мегардад.