Рушди сохтори нақлиёт дар фазои СҲШ

Душанбе, 15.05.2015. (АМИТ «Ховар»,  Кристина  Эрлих).- Имрӯз,  15  май, вазирони  нақлиёти  давлатҳои узви Созмони  ҳамкории  Шанхай дар   шаҳри  Уфа  масоили  лоиҳаҳои  нави  муштарак дар  бахши  сохтори  нақлиётӣ,  аз ҷумла  татбиқи лоиҳаи «Чин — Аврупои  Ғарбӣ» — ро мавриди  муҳокима  қарор  медиҳанд.
Тавре  ки  аз  хадамоти  матбуоти Вазорати нақлиёти  ҶТ ба  АМИТ «Ховар»  хабар  доданд, Ҷумҳурии  Тоҷикистонро  дар  ин  чорабинӣ  вазири  нақлиёти  кишвар  Шералӣ  Ганҷалзода  намояндагӣ мекунад.
Вазирон  дар  ҷараёни  машварат  роҳҳои  рушди  ҳамкорӣ дар  бахши нақлиёти автомобилӣ,  роҳи  оҳан ва ҳавоӣ, рӯи  кор  овардани  сохтори нави  нақлиётӣ  ва лоиҳаҳои нав,  ташаккули   низоми  умумии  нақлиётии  СҲШ — ро  баррасӣ  мекунанд. Муҳокимаи татбиқи роҳравҳои нақлиётии «Чин — Аврупои  Ғарбӣ» яке  аз  масъалаҳои муҳокимашаванда маҳсуб  меёбад.
Қобили  зикр  аст, ки  17 ҳайати  миллӣ бо  роҳбарии  вазирони  давлатҳои  узви  СҲШ аз Чин,  Қазоқистон,  Русия,  Тоҷикистон,  Қирғизистон ва  Ӯзбекистон, ҳамчунин нозирони  СҲШ  ва мушорикони  муколамаи  СҲШ аз  Покистон,  Ҳиндустон,  Афғонистон,  Эрон,  Муғулистон,  Беларус,  Туркия  ва Шри —  Ланка ба   шаҳри  Уфа  омадаанд.