Сафари М.Ҷабборӣ ба вилояти Хатлон

Душанбе, 19.05.2015. (АМИТ «Ховар»).- Имрӯз сафари муовини Сарвазири Ҷумҳурии Тоҷикистон Марҳабо Ҷабборӣ ба вилояти Хатлон аз боздиди ноҳияи Шаҳритус оғоз ёфта, мавсуф аз мактаби бачагонаи варзишии ноҳия боздид намуд. Муовини Сарвазир зимни вохӯрӣ бо тарбиягирандагони мактаб зикр намуд, ки ба шарофати сиёсати ба инсондӯстонаи Сарвари давлат Эмомалӣ Раҳмон дар ҷумҳурӣ ба рушди варзиш, хусусан ба рушди варзиши байни ҷавонон таваҷҷуҳи хосса зоҳир мегардад.М.Ҷабборӣ ҳамчунин изҳор дошт, ки дар ноҳияи Шаҳритус барои рушди варзиш ҳамаи шароити зарурӣ фароҳам оварда шудааст. Биноан дастпарварони мактаб бояд ба варзиш машғул шуда, ҳамзамон таҳсилро идома диҳанд, зеро ояндаи кишвар вобаста ба ҷавонон аст. Роҳбарияти ноҳия ва мураббиҳои бахши варзиш итминон доданд, ки ба дастовардҳои нав дар бахши варзиш ноил хоҳанд шуд.