Сафари паҳлавонони тоҷик ба Қазоқистон

Душанбе, 7.05.2015. (АМИТ “Ховар”, Ситораи Боймурод).- Тибқи иттилои Кумитаи миллии олимпии кишвар, дирӯз 6-уми май дастаи мунтахаби самбои Тоҷикистон барои ширкат дар мусобиқаи байналмилалии гӯштини самбо ба хотираи Қаҳрамони Иттиҳоди Шӯравӣ Таимбет Комекбоев, ки рӯзҳои 8-ум ва 9 майи соли равон дар вилояти Қизилурда баргузор мешавад, ба Қазоқистон сафар карданд
Гуфта мешавад, ки дар ин мусобиқаи анъанавии байналмилалӣ ширкати варзишгарон аз 25 кишвар дар назар аст. Ба ҳайати мунтахаби Тоҷикистон 6 гӯштингир — Акмалиддин Каримов, Бобоҷон Зоиров, Бахтовар Каримов (ҳар се дар вазни 57 кг), Хушқадам Хисравов (62 кг), Саидмуъмин Шомаҳмадов (100 кг) ва Салимбек Салимбеков (+100 кг) — дохиланд. 
 Пас аз анҷоми мусобиқаи самбо сабқати гӯштини миллии қазоқии «курес” дар вазни мутлақ барпо мегардад. Ғолиби ин сабқат бо мошини сабукрави «Toyota Prado” сарфароз мешавад. Инчунин паҳлавононе, ки ҷойҳои дувуму севумро мегиранд, бо мошинҳои сабукрав мукофотонида хоҳанд шуд.