Семинар: «Нашъамандӣ ва оқибатҳои фоҷиабори он»

Душанбе, 7. 05. 2015. (АМИТ «Ховар», Мавҷуда Анварӣ).-Дар муассисаи давлатии таълимии «Литсейи касбӣ-техникии сохтмонӣ»-и шаҳри Хуҷанд семинари омӯзишӣ доир ба шарҳи «Стратегияи миллии мубориза бар зидди гардиши ғайриқонунии маводи мухаддир дар Ҷумҳурии Тоҷикистон барои солҳои 2013-2020» баргузор гардид.
Дар он намояндаи Раёсати Агентии назорати маводи нашъаовар дар вилояти Суғд оид ба мақсад ва дурнамои стратегияи мазкур ва роҳҳои татбиқи самарабахши он, инчунин нисбат ба масоили мубориза алайҳи муомилоти ғайриқонунии маводи мухаддир, ҳамкориҳои байналмилалии Тоҷикистон бо созмонҳои ҷаҳониву минтақавӣ дар самти мазкур, вазъи умумии нашъамандӣ дар минтақа ва паҳлӯҳои тиббиву иҷтимоӣ ва ҷиноии нашъамандӣ ҳарф зада, иҷрои талаботи ин ҳуҷҷати муҳими давлатиро вазифаи бечунучарои сохторҳои марбутаи давлатӣ ва аъзои ҷомеа унвон кард.
Аз ҷониби иштирокчиён саҳнача ва баромадҳои ҷолиби диққат гузошта шуд. Ҳамчунин аз ҷониби кормандони шуъбаи гурӯҳи ноҳияҳои минтақаи Зарафшони Раёсати Агентӣ дар мактабҳои таҳсилоти миёнаи умумии рақамҳои 25, 37 ва 40-и шаҳри Панҷакент дар мавзӯъҳои «Нашъамандӣ ва оқибатҳои фоҷиабори он» ва «Пешгирии ҷавонону наврасон аз пайвастан ба созмонҳои экстремистиву террористӣ» вохӯриҳои пешгирикунанда ва фаҳмондадиҳӣ баргузор шуданд.