Ширкати Тоҷикистон дар ҷаласаи раванди Истанбул оид ба Афғонистон

Душанбе, 29.05.2015 (АМИТ «Ховар»).- 25 майи соли 2015  дар шаҳри Исломобод ҷаласаи шахсони мансабдорони аршади давлатҳои аъзои раванди Истанбул оид ба Афғонистон «Қалби Осиё»  баргузор шуд. Ҷумҳурии Тоҷикистонро дар он Сафири Ҷумҳурии Тоҷикистон дар Ҷумҳурии Исломии Покистон Шералӣ Ҷононов намояндагӣ намуд.
Дар ҷаласаи мазкур масъалаҳои мубрами рушди раванди ҷараёни Истанбул, вазъи амният дар Афғонистон ва дар минтақа, ҳамчунин лоиҳаҳои афзалиятнок дар рушди робитаҳои тиҷоратӣ-иқтисодӣ, аз ҷумла лоиҳаҳои CASA-1000, долони иқтисодии Чину Покистон, сохтмони роҳҳои мошинӣ ва роҳи оҳан, инчунин лоиҳаи ТАПИ баррасӣ гардиданд.
Диққати муҳим дар ҷаласаи мазкур ба масъалаи рӯзномаи Конфронси қарибулвуқӯи вазирони корҳои хориҷии раванди Истанбул оид ба Афғонистон «Қалби Осиё»,  масъалаҳои афзоиши ифротгароӣ ва терроризм дар қаламрави Афғонистон ҳамчун омили амният дар минтақа равона гардид.