Суғд: Қадрдонии собиқадорони ақибгоҳ бо нишонҳо

 
Хуҷанд, 08.05.2015. (АМИТ “Ховар”, Абдуаҳад Шарифзода).-Дар шаҳру ноҳияҳои вилояти Суғд вобаста ба таҷлили 70-солагии иди Ғалаба чорабиниҳои мухталиф доир гардида истодаанд. Дирӯз чунин  чорабинии хотирмон дар ҷамоати деҳоти Ёваи ноҳияи Бобоҷон Ғафуров доир гашт. 
Тавре ки масъулин аз Шӯрои собиқадорони ҷангу меҳнати ҷамоати мазкур иттилоъ доданд, зимни баргузории чорабинии тантанавӣ бахшида ба 70- солагии Ғалаба, ки бо иштироки аҳли ҷамоат, собиқадорони меҳнат, оилаҳои иштирокчиёни Ҷанги дуюми ҷаҳонӣ,  ҷанговарони интернатсионалист, толибилмону  омӯзгорони мактаб ва раисони кумитаи маҳаллаҳо баргузор гашт, 11 нафар собиқадор аз ҷамоати мазкур, ки дар давраи солҳои Ҷанги дуюми ҷаҳонӣ дар ақибгоҳ хизмат намудаанд, бо Фармони вазири мудофиаи Ҷумҳурии Тоҷикистон бо медали «70-солагии Ғалаба» дар Ҷанги дуюми ҷаҳонии солҳои 1941-1945 сарфароз гардонида шуданд.