Т.И.Соомро: «Суботи кишвар дастоварди бузурги халқи тоҷик аст»

Душанбе, 06.05.2015. (АМИТ «Ховар», Муқаддас Темурзода ).- Мулоқоти  вазири  корҳои  дохилии  ҶТ Раҳимзода  Рамазон  Ҳамро  бо Сафири  навтаъйини  фавқулодда  ва  мухтори Ҷумҳурии  Исломии  Покистон  дар  Тоҷикистон  Тариқ Иқбол Соомро баргузор  гардид.
Назар  ба  иттилои  ВКД  ҶТ,  Тариқ  Иқбол Соомро   зимни  мулоқот  зикр намуд, ки сулҳу суботи  ҷумҳурӣ  дастоварди  бузурги  халқи тоҷик  аст, ки  он  боиси рушду  шукуфоии  кишвараш  гардида,   дар  он  хидмати  Вазорати  корҳои дохилӣ  бузург  аст.
Зимни  мулоқот  масоили  рушди муносибатҳои  дуҷониба  дар  бахши  табодули  иттилоот ва  мубориза бо ҷинояткории  трансмиллӣ,  терроризм,  ифротталабӣ,  гардиши  ғайриқонунии  маводи  мухаддир  баррасӣ  шуданд.
Зикр  шуд, ки  заминаи  ҳуқуқии  ҳамкории  миёни  мақомоти  корҳои дохилии  ҳар  ду  кишвар  рушду  густариш меёбад.  Соли  2004  байни  ҳукуматҳои  Ҷумҳурии  Тоҷикистон  ва  Ҷумҳурии  Исломии  Покистон  Созишномаи  ҳамкорӣ  дар  мубориза бо гардиши  ғайриқонунии  маводи  мухаддир ва  моддаҳои  фалаҷкунандаи  асаб  ба  имзо  расид.
Ҳамзамон  лоиҳаи Созишномаи  байни  ҳукуматҳои  ҳар  ду  кишвар  дар  бораи  ҳамкорӣ  дар  мубориза бо  ҷинояткорӣ, ки  дар  марҳалаи  баррасӣ  қарор  дорад,  мавриди  муҳокима  қарор  гирифт. 
Ҷонибҳо  аз таҳкими  ҳамкории  дуҷониба  баъди имзои  созишномаи  мазкур  изҳори  қаноатмандӣ  карда,  иброз  доштанд, ки  бояд саъю  кӯшишҳои  муштарак   дар  мубориза бо терроризм  ва ҷинояткории  муташаккилона вусъат  дода шаванд.
Мулоқот  дар  фазои  ҳамфикрию  ризоият  гузашт.