Таҷлили Рӯзи оила дар Нуробод

Нуробод, 16.05.2015. (АМИТ «Ховар», Субҳониддини Маҳмуд).-Бахшида ба иди байналмилалии оила ва эълон гардидани соли 2015 соли оила дар ноҳияи Нуробод ҷамъомади бошукӯҳу хотирмон баргузор гардид. Дар ҷамъомад муовини аввали раиси ноҳия Мирзоумар Давлатов аҳли ноҳияро бо иди фархунда табрик намуд. Иштирокчиёнро мудири САҲШ-и ноҳия Дилором Сафоева, раиси ҷамоати деҳоти Сафедчашма Одинамаҳмад Раҷабов, собиқадори меҳнат Боғигул Қаландарова, корманди соҳаи тибби ноҳия Шаҳристон Шокирова ва дигарон бо Рӯзи оила табрик намуда, барои пойдории оилаҳои ҷавон маслиҳатҳои судбахш доданд. Мақомоти иҷроияи ҳокимияти давлатии ноҳияи Нуробод ва раисони шаҳраку деҳот ба оилаҳои намунавӣ туҳфаҳои хотиравӣ тақдим карданд. Дар анҷоми ҷамъомад ҳунармандони бахши фарҳанги ноҳия бо барномаи рангини кансертӣ хотири ширкаткунандагонро болида гардониданд.