ВКД маблағи силоҳҳои ҷамъмеовардаашро ҷуброн менамояд

Душанбе, 21.05.2015.(АМИТ «Ховар», Марзия Саидзода).- Парлумони Тоҷикистон ба Қонуни Ҷумҳурии Тоҷикистон «Дар бораи силоҳ» тағйирот ворид намуд, ки тибқи он 319 таппонча, туфангчаҳо ва патронҳои ҷароҳатрасон, ки ба таври қонунӣ дар ихтиёри шаҳрвандон аст, манъ шуда, аз ҷониби Вазорати корҳои дохилӣ /ВКД/-и ҷумҳурӣ ҷамъоварӣ мегарданд. Рамазон Раҳимзода -вазири корҳои дохилии кишвар зимни тавзеҳи лоиҳаи қонуни мазкур гуфт, ки мақсади тағйирот ба қонун муайян намудани тартиби аз гардиш гирифтан ва ҷуброни маблағҳои силоҳи оташфишони бемили зарбаш маҳдуд, туфангчаҳо , тапончаҳо ва патронҳои ҷароҳатрасон, ки шаҳрвандон то манъ намудани гардиши он бо қонуни мазкур дар ихтиёри худ доранд, маҳсуб меёбад. Вазир афзуд, ки 26 июли соли 2014 ба моддаи 9-и қонуни мазкур тағйиру иловаҳо ворид шуд, ки тибқи он гардиши силоҳҳои номбаршуда манъ шудааст. Дар айни замон 319 таппонча, туфангчаҳо ва патронҳои ҷароҳатрасон дар ихтиёри шаҳрвандон қарор дошта, истифодаи онҳо муваққатан манъ шудааст. Инчунин 16 адад тапончаи газӣ бо патронҳои ҷароҳатрасон аз шаҳрвандон мусодира шуд. Зикр гардид, ки дар лоиҳаи қонун қисми 3 моддаи 31 дар таҳрири нав таҳия шуда, қисми 4-и моддаи мазкур хориҷ шудааст, чунки дар қонуни мазкур тартиби аз гардиш гирифтани силоҳ ва лавозимоти ҷангиро ВКД муайян намуда, тартиби ҷуброни силоҳро Ҳукумати Тоҷикистон муайян менамояд. Рамазон Раҳимзода таъкид кард, ки бо мақсади поймол нагаштани ҳуқуқҳои конститутсионии шаҳрвандон баъди гирифтани силоҳҳои мазкур аз суратҳисоби махсуси вазорат марҳила ба марҳила маблағҳои силоҳои мусодирашударо Вазорати корҳои дохилӣ пардохт менамояд.