Вохӯрии Низомиддин Зоҳидӣ бо Кевин Аллен

Душанбе, 21.05.2015 (АМИТ «Ховар»).- 20 майи соли 2015 муовини вазири корҳои хориҷии Ҷумҳурии Тоҷикистон Низомиддин Зоҳидӣ роҳбари Намояндагии Раёсати Комиссари Олии СММ оид ба умури паноҳандагон (UNHCR) дар Тоҷикистон Кевин Алленро ба ҳузур пазируфт.Дар мулоқот ҷонибҳо дар атрофи фаъолияти UNHCR дар Тоҷикистон дар самти таъмини ҳимоя ва расонидани кумак ба паноҳандагон ва паноҳҷӯён дар кишвар ва минтақаи Осиёи Марказӣ табодули назар карданд.Инчунин 20 май муовини вазири корҳои хориҷии Ҷумҳурии Тоҷикистон Низомиддин Зоҳидӣ бо Сафири Фавқулода ва Мухтори Ҷумҳурии Исломии Эрон дар Ҷумҳурии Тоҷикистон Ҳуҷҷатуло Фағонӣ мулоқот анҷом дод. Зимни суҳбат масоили марбут ба раванди ҳамкориҳои сиёсию иқтисодӣ ва илмию фарҳангии байни ду кишвар, ҳамчунин масъалаҳои мубрами минтақавию байналмилалӣ баррасӣ шуданд.Дар мулоқоти муовини вазири корҳои хориҷии Ҷумҳурии Тоҷикистон Низомиддин Зоҳидӣ бо Сафири Ҷумҳурии Туркия дар Ҷумҳурии Тоҷикистон Меҳмет Мунис Дирик 19 май дар Душанбе масъалаҳои мубрами муносибатҳои дуҷониба, татбиқи лоиҳаҳо бо иштироки Дафтари ҳамоҳангсози Агентии ҳамкориҳои байналмилалии Туркия (ТIКА) дар Душанбе ва ҳамкорӣ дар доираи созмонҳои байналмилалӣ ва минтақавӣ баррасӣ шуданд.