Зӯроварӣ дар оилаҳо дида мешавад?

Душанбе, 15. 05. 2015. (АМИТ «Ховар», Мавҷуда Анварӣ).-Бахшида ба Рӯзи байналмилалии оила дар Шӯрои адлияи Ҷумҳурии Тоҷикистон дар мавзӯи «Масъалаҳои такмили қонунгузории оила» мизи мудаввар доир гардид. 
Иштирокчиёни мизи мудаввар ба муҳимтарин масъалаҳои оиладорӣ, ки имрӯз воқеан ҳам ташвишовар аст, таваҷҷуҳ намуда, таъкид карданд, ки ҳарчанд дар ин самт санаду меъёрҳои ҳуқуқӣ ва қонунҳои дахлдор қабул гардидаанд, вале ҳоло ҳам зӯроварӣ нисбат ба занону кӯдакон дар оилаҳо дида мешавад. 
Ҳамзамон таваҷҷуҳи ҳозирин ба масъалаи солимгардонии оила, никоҳи хешутаборӣ аз нигоҳи дини ислом, аз муоинаи тиббӣ гузаронидани шахсони издивоҷкунанда ҷиҳати беҳдошти солимгардонии оила, омилҳои манфии никоҳи хешутаборӣ, масъалаҳои баҳснок оид ба рӯёнидани алимент, баррасии парвандаҳо вобаста ба баҳсҳои судӣ марбут ба тарбияи фарзандон ва дигар масъалаҳои ташишовари ҳаёти оилавӣ равона гардид.