Ҳар моҳ кариб се ҳазор курдҳои язид тарки Ироқ мекунанд

Душанбе, 26.06.15. (АМИТ «Ховар»). – Ба  гуфтаи  вакили   парлумони  Ироқ  Фиён  Даҳил, ҳар  моҳ  қариб  3 ҳазор  нафар   курдҳои  язид ба хотири  наҷот  ёфтан  аз  силоҳбадастони  «Давлати  исломӣ» Ироқро тарк  мекунанд. Дар  ин  бора  васоити  ахбори  оммаи  хориҷӣ  хабар  медиҳанд.
Тавре  ки  хонум  Фиён  Даҳил  иброз дошт,  «ҳар рӯз  беш  аз  100 нафар   курдҳо  барои  наҷот  ёфтан  аз  бедодгарии  силоҳбадастони  ДИ аз  кишвар  рӯ ба  гурез   оварда,  ҳар   моҳ  қариб 3 ҳазор  аъзои  ҷамоа  бештар  тавассути  Туркия  тарки  Ироқ мекунанд».
Ба  гуфтаи  вакил,  сабаби  аз  минтақаҳои  шимолии  Ироқ  рӯ  ба  гурез   овардани  теъдоди  зиёди  язидҳо «шитоб  надоштани  артиши  Ироқ  барои  озод  намудани  ин  минтақа ва  мавҷуд   набудани  ёрии   зарурӣ  ба  курдҳои  минтақаҳои  аз  террористон озодшуда  аст».  Вазъияти  урдугоҳҳои  гурезаҳои  Курдистони  Ироқ, ки  язидҳои  бехонумоншуда дар онҳо  будубош доранд,  душвор  мегардад.
Тобистони  соли 2014   силоҳбадастон  минтақаҳои сукунати  курдҳои язидро  забт  карда буданд. Тибқи маълумоти  вазорати  ҳуқуқҳои  инсони  Ироқ,  ДИИШ  садҳо  нафар  мардонро  «нест карда»,  занонро  барои  ғуломии  шаҳвонӣ  фурӯхтааст.