Мусобиқаи велосипедронӣ бар зидди сӯйистеъмоли маводи нашъаовар

   Душанбе, 27.06.2015. (АМИТ  «Ховар», Лайло Тоирӣ).- Дар Рӯзи байналмилалии мубориза бар зидди сӯйистеъмоли маводи нашъадор ва муомилоти ғайриқонунии маводи нашъадор- 26 июн кормандони Агентии назорати маводи нашъаовари назди Президенти ҶТ дар якҷоягӣ бо Ассотсиатсияи велосипедронони Тоҷикистон ва Академияи олимпии ҷумҳурӣ мусобиқаи велосипедрониро ташкил намуданд, ки дар он зиёда аз бист нафар варзишгар иштирок намуд.  Мусобиқаи велосипедронӣ аз бинои агентӣ оғоз ёфта, дар ноҳияҳои Сино ва Фирдавсии пойтахт давом ёфт.

Дар ҷойҳои таваққуф бо мақсади паст намудани зарари истеъмоли маводи нашъаовар ва тарғиби тарзи ҳаёти солим корҳои фаҳмондадиҳӣ гузаронида шуданд. Иштирокдорони мусобиқа ва кормандони агентӣ ба мардум доир ба ташаббусҳои Ҳукумати Ҷумҳурии Тоҷикистон дар самти  назорати маводи нашъадор, хатари ҷалби наврасон ба истеъмоли маводи нашъадор нақл намуданд.