Се ҳамлаи маргбор дар Фаронса, Кувайт ва Тунис

Душанбе, 27.06.2015. (АМИТ «Ховар»).-Рӯзи ҷумъа дар Фаронса, Кувайт ва Тунис бо фарқият  дар чанд соат ҳамлаҳои террористӣ сурат гирифтанд. Ифротгаро Ёсин Солеҳӣ ба корхонае дар шаҳри Сен-Кантен-Фаллав, ки ба иттилои Франс-Инфо худ дар он кор мекардааст,  ҳамла карда, директори онро кушта, сарашро буридааст.  
    26 июн дар дохили масҷиде, воқеъ дар ноҳияи Эс-Савабер дар маркази Эл-Кувайт    таркиш рух дод. Бар асари таркиш тамоми тирезаҳои бино шикастанд. Тавре ки хабарнигори ТАСС-шоҳиди ҳодиса хабар медиҳад, ин амали террористӣ буд, ки аз ҷониби маргталаб анҷом дода шуд. Ба иттилои ВАО-и арабӣ гурӯҳи ифротгарои ба ном «Давлати исломӣ» масъулияти ин амали мудҳишро ба уҳдаи худ гирифтааст.
    Бар асари ҳамлаи рӯзи ҷумъаи террористон ба меҳмонхонае дар шаҳри Сусаи Тунис на камтар аз 39 нафар фавтида, 36 нафари дигар ҷароҳат бардоштааст. Тавре ки Вазорати корҳои дохилии мамлакат хабар додааст, дар миёни қурбониёни амали террористӣ шаҳрвандони дигар давлатҳо низ ҳастанд. Ба иттилои радиои Тунис шаҳрвандони хориҷии фавтида сокинони Олмон ва Британияи Кабиранд. Тибқи маълумоти пешакӣ, ҳамла аз ҷониби террористон анҷом дода шуда, онҳо ба сӯи истироҳаткунандагон оташ кушодаанд. Ба иттилои манбаъ, як ҳамлагар кушта шудааст.
    Тавре ки мебинем, имрӯзҳо аз ҷониби террористону ифротгароён ва саркардагони ҳаракату гурӯҳҳои ба ном исломӣ дар аксар шаҳру кишварҳои бузург куштору таркиш ва дигар амалҳои даҳшатафканию ифротгароёна анҷом дода мешаванд. Қотилоне, ки ин гуна амалҳоро дар ҳар гӯшаю канори олам тарҳрезӣ мекунанд, мехоҳанд бо ин чашми мардумро тарсонида, афкору ғояҳои ифротии хешро     тавассути зӯроварию даҳшатафканӣ ба дигарон бор кунанд. Вале мардуми солимфикри олам пайваста ба муқобили ин гуна амалҳои ғайриинсонӣ мубориза бурда, ҷомеаро аз ин шайтонсифатон пок месозанд.
Мардуми Тоҷикистон, ки ҷанги дохилиро аз сар гузаронида, солиёни дароз захмҳои онро табобат кардааст, ҳамеша ба муқобили ифротгароёну террористон муборизаи қатъӣ мебарад. Тоҷикон ҳеҷ гоҳ роҳ намедиҳанд, ки ба сулҳу  амният ва ҳамбастагию иттиҳоди ин миллату ин кишвар хатаре аз дохил ё хориҷ таҳдид кунад ва бо шукргузорӣ аз сиёсати хирадмандонаи Сарвари давлат ба сӯи саодату субот ва созандагии комил равонаанд.