Қувваҳои ҳарбӣ-ҳавоии Покистон 23 ифротгароро дар сарҳади Афғонистон нест карданд

Душанбе, 29.06.2015 (АМИТ «Ховар»).  Қиркунандаҳои  қувваҳои ҳарбӣ-ҳавоии Покистон 28 июн дар ҷараёни зарбаҳои ҳавоӣ 23 ифротгароро дар воҳиди тақсимоти маъмурӣ-марзии Вазиристони Шимолӣ дар сарҳади Афғонистон нест карданд. Дар ин бора шабакаи телевизионии «Дунё» хабар додааст. 
Ба иттилои Вазорати мудофиаи Покистон, инчунин  паноҳгоҳи террористон вайрон карда шуд, дар дохили онҳо якчанд шаҳрванди хориҷӣ ва анбори лавозимоти ҷангӣ мавҷуд будааст. Яке аз қумандонҳои саҳроии хатарноки «Толибон» дар самти  шимолу ғарбии Покистон кушта шудааст. 
Дар тӯли соли охир дар Вазиристони Шимолӣ амалиёти ҳарбӣ бо номи рамзии «Зарб-э-Азб» (зарбаи хатарнок) гузаронида мешавад. Тавре  ки мақомоти мудофиавӣ иттилоъ медиҳанд, дар ин муддат 2763 террорист нобуд карда шуда, 837 паноҳгоҳ вайрон  гардида, 253 тонна моддаи тарканда мусодира шудааст. 
Ҳарбиён 347 нафарро талаф додаанд. Дурустии маълумоти мазкурро санҷидан номумкин мебошад, зеро дастрасии рӯзноманигорон ба ин минтақа маҳдуд аст. 
Рӯзи сешанбе дар Исломобод вохӯрии Сарвазири Покистон Навоз Шариф бо фармондеҳи артиш Роҳил Шариф доир гардид. Пас аз анчоми он  намояндаи расмии Сарвазир Даниел Гелонӣ ба рӯзноманигорон хабар дод, ки Покистон шиддати амалиётро бар зидди низомиён паст намекунад.