Ба зарардидагони Рашт беш аз 100 тонна семент ва масолеҳи сохтмонӣ фиристода шуд
Душанбе, 21.07.2015. (АМИТ «Ховар»). -Субҳи имрӯз бо супориши Президенти Ҷумҳурии Тоҷикистон Эмомалӣ Раҳмон ҳайати ҳукуматӣ бо роҳбарии Сарвазири мамлакат Қоҳир Расулзода ба маҳалли аз офати табиӣ зарардидаи ноҳияи Рашт сафар кард. Хотиррасон бояд кард, ки 20 июли соли равон бар асари боришоти зиёд ва фаромадани сел дар деҳаҳои Ҳалқарф ва Бедаки ҷамоати деҳоти Навдии ноҳияи Рашт манзилҳои истиқоматӣ, роҳ, хатҳои интиқоли барқ, иншооти обрасон ва дигар иншооти таъйиноти гуногун хароб гардида, як талафоти ҷонӣ низ ба қайд гирифта шуд.
Ҳодиса нимаи дуюми рўз ба вуқуъ пайваста, бар асари он тибқи маълумоти пешакӣ зиёда аз 50 манзили истиқоматӣ пурраю қисман, беш аз ду километр роҳҳои маҳалӣ, 6 км хатҳои интиқоли барқ, зиёда аз 5 км хатҳои обгузару иншооти обрасон ва дигар иншооти хоҷагии халқ хароб мегарданд. Сарвазири мамлакат Қоҳир Расулзода ҳамроҳ бо гурўҳи кории ҳукумати ҷумҳурӣ дар аввал ба хонаи нафари ҳалокшуда ташриф оварда, ба ин оила таъзия ва кумаки пулии Президенти Ҷумҳурии Тоҷикистонро расонид. Ҳамчунин дар ин рўз кумакҳои Сарвари давлат дар ҳаҷми беш аз 38 тонна маҳсулоти хўрокӣ, маводи аввалияи рўзгор, хайма ва сўзишворӣ ба зарардидагон дастрас шуд.
Бегоҳии имрўз бо дастури Президенти Ҷумҳурии Тоҷикистон аз ҷониби Агентии захираҳои моддии давлатӣ ба маҳалли офатзадаи ноҳияи Рашт беш аз сад тонна семент ва дигар масолеҳи сохтмонӣ фиристода шуд.
Ҳоло дар деҳаи Ҳалқарф барои зарардидагон бунёди шаҳраки хаймаҳо оғоз шуда, дар ҳамин деҳа аллакай барои бунёди манзилҳои истиқоматӣ 8 гектар замин ҷудо гаштааст. Дар маҳали ҳодиса мутахассисони сохторҳои роҳу нақлиёт, энергетика, ҳолатҳои фавқулода ва тандурустӣ сафарбар гардида, ба мардуми эҳтиёҷманд хизмат мерасонанд.
Дар анҷоми боздид аз маҳалҳои офатзада ҷаласаи ситоди сайёри ҷумҳуриявӣ доир гардид. Сарвазири мамлакат дар ситод роҳбарони вазорату идораҳои дахлдор ва мақомоти иҷроияи маҳалии ҳокимияти давлатӣ дар ноҳияро барои сари вақт таъмин кардани аҳолии зарардида бо барқу об, хайма, маводи ғизоӣ ва дигар ашёи зарурии рўзгор вазифадор намуд.








МегаФон Тоҷикистон: МегаҚувва гигабайтҳоро дучанд менамояд
Имрӯз дар водиҳои Тоҷикистон ҳаво то 22 дараҷа гарм мешавад
Ҳамкории Тоҷикистон ва Созмони ҳамкории иқтисодӣ баррасӣ гардид
Дар Кумитаи хоҷагии манзилию коммуналӣ бахшида ба Рӯзи Президент чорабинии тантанавӣ баргузор гардид
Дар шаҳри Панҷакент маркази хизматрасонӣ ва тарабхона ба истифода дода шуд
Дар Кӯлоб барои омодагӣ ба ҳолатҳои фавқулода ҷаласа доир шуд
Бахшида ба Рӯзи Президент дар шаҳри Бӯстон Рӯзи дарҳои кушод доир гардид
ПАНҶАКЕНТИ ҚАДИМ. Оид ба омӯзиши он конференсияи илмӣ баргузор шуд
Дар шаҳри Панҷакент фаъолияти корхонаҳои саноатӣ тақвият меёбад






