Барои риоя накардани қоидаҳои бехатарӣ 114 нафар ба ҷавобгарии маъмурӣ кашида шуд

Душанбе, 10.07.2015. (АМИТ «Ховар», Раъно Нусратуллозода).-Аз ҷониби кормандони хадамот барои риоя накардани қоидаҳои бехатарии саноатӣ 114 нафар ба ҷавобгарии маъмурӣ кашида шуда, ба маблағи 83 ҳазору 120 сомонӣ ҷаримабандӣ  шуд. Ин нуктаро имрӯз зимни нишасти матбуотӣ сардори Хадамоти назорати давлатии бехатарии корҳо дар саноат ва соҳаи кӯҳкории назди Ҳукумати ҶТ Раҳим Санъат Асо  хабар дод.
    Дар давраи ҳисоботӣ дар корхонаҳои зериназоратӣ аз тарафи нозироти марказӣ 95 ва нозироти комплексӣ 91 ҷаласа ва маърӯзаҳо оид ба талаботи бехатарии саноатӣ, ҳифзи меҳнат ва фаҳмондани моҳияти Қонуни Ҷумҳурии Тоҷикистон «Дар бораи бехатарии саноатии иншооти истеҳсолии хатарнок» гузаронида шудааст.
    Инчунин дар нишаст гуфта шуд, ки аз тарафи нозироти хадамот 7 ҳодисаи нохуш ва як садамаи истеҳсолӣ ба қайд гирифта шудааст, ки нисбат ба  онҳо тафтишоти махсуси техникиро ба анҷом расониданд.