Дар 15 корхонаи истеҳсолӣ низоми идораи сифат аз рӯи стандарти байналмилалӣ ҷорӣ гардид

Душанбе, 10.07.2015. (АМИТ “Ховар”, Раъно Нусратуллозода).-Дар давоми соли 2015 бо мақсади дастгирии рушди истеҳсолоти ватанӣ, ҷиҳати истеҳсоли маҳсулоти босифат ва рақобатпазир, ҳамзамон баланд бардоштани имконоти содиротии мамлакат татбиқи “Барномаи давлатии сифат барои солҳои 2013 — 2015” идома ёфта,  дар асоси нақшаи барномаи мазкур дар 15 корхонаи истеҳсолӣ тибқи феҳристи Барнома  низоми идоракунии сифат аз рӯи стандартҳои байналмилалӣ ҷорӣ карда шуд.Дар ин бора Ибодулло Қурбониён, директори «Тоҷикстандарт» 10 июл зимни нишасти матбуотӣ иттилоъ дод. 
Ҳамзамон дар заминаи дастгирии молистеҳсолкунандагони ватанӣ аз тарафи шуъбаи стандартонӣ ва бақайдгирии ҳуҷҷатҳои меъёрӣ 4100 саҳифа ҳуҷҷатҳои меъёрӣ ҳамчун омили баланд бардоштани сифати маҳсулот ва хизматрасонӣ ба субъектҳои хоҷагидор таъмин карда шуда, дар ин давра аз тарафи мутахассисон 75 лоиҳаи стандартҳои байнидавлатӣ(ГОСТ) низ баррасӣ карда шуданд.