Дар нимсолаи якум 6034 ҳолати вайронкунии қонунгузории замин ошкор шуд

     Душанбе, 13.07.2015. (АМИТ «Ховар», Маҳинаи Собир).-  Дар нимсолаи аввали соли 2015 аз ҷониби мақомоти идораи замини Ҷумҳурии Тоҷикистон 6034 ҳолати  вайронкунии  қонунгузории  замин  ошкор шуда, нисбат ба 4832 ҳолат дастур, 4220 санад ва дар 4219 ҳолат қарорҳои ҷаримабандӣ  қабул шуда, ба маблағи 1 млн. 372 ҳазору 340 сомонӣ ҷарима баста шудааст, ки аз ин 905 ҳазору 620 сомонӣ ба суратҳисоби кумитаҳои идораи замин  ворид шудааст. Ин  нуктаро  имрӯз, 13 июл раиси Кумитаи давлатии идораи замин  ва геодезии Ҷумҳурии Тоҷикистон Ятимзода Акбари Табарӣ ба хабарнигорон зимни нишасти хабарӣ иброз намуд. 
Тибқи иттилои мавсуф, барои додани баҳои ҳуқуқӣ 412 мавод ба прокуратура , 547 мавод барои ба таври маҷбурӣ ситонидани маблағи ҷаримаҳо ба судҳо ирсол шуда, 3561 ҳолати вайронкунии қонунгузории замин дар маҳал бартараф карда шудааст.