ФБД: Ҳангоми баланд шудани ҳарорат қабул ва гусели ҳавопаймоҳои гаронвазн шабона сурат мегирад

Душанбе, 02.07.2015. (АМИТ «Ховар», Лайло Тоирӣ).-Бо  баланд шудани  ҳарорати ҳаво «Фурудгоҳи байналмилалии Душанбе»  вазни ҳавопаймоҳои боркашро кам карда, қабул ва гусели ҳавопаймоҳои гаронвазнро дар соатҳое, ки ҳарорат мўътадил мешавад ё шабона ба роҳ мемонад. 
Дар ин бора ба АМИТ «Ховар» котиби матбуотии «Фурудгоҳи байналмилалии Душанбе» М.Шодиев иттилоъ дод.   Бино ба гуфтаи сарчашма,  аэродром (қисми дохили фурудгоҳ ки ба ҳавопаймоҳо хизмат мерасонад) майдони васеъ буда,  дар рўзҳои гарми тобистон  аз дигар мавзеъҳо гармтар мешавад.
Ба гармии ҳаво нигоҳ накарда,  фурудгоҳи Душанбе дар доираи нақшаи чорабиниҳо  ба ҳавопаймоҳо хизматрасониҳои рўизаминӣ ва муҳандисиву техникиро  мерасонад. 
То ҳол дар нақшаи парвозҳои фурудгоҳи Душанбе вобаста ба баланшавии ҳарорати ҳаво дигаргунӣ ҷорӣ нашуда, парвозҳои ҳавопаймоҳои мусофирбар ва боркашон мувофиқи ҷадвал сурат гирифта истодаанд. Дар сурати аз меъёр баланд  шудани ҳарорат мутобиқи технологияи ҷорӣ тадбирҳои зарурӣ андешида  мешаванд.
Вобаста ба баландшавии ҳарорати ҳаво аз ҷониби хадамоти ҷустуҷӯӣ-садамавию наҷотдиҳии таъминоти парвозҳои фурудгоҳ варақаи таблиғотии махсус иншо шудааст, ки дар он таъкид мегардад, ки  ҳангоми хизматрасонӣ ба ҳавопаймоҳо инчунин дар коргоҳҳо, ҷойҳои нигоҳдории моеъҳои зуддаргиранда, техникаи бехатарӣ пурра риоя карда шуда, дастгоҳҳои барқӣ ва гармидиҳанда бе назорат гузошта нашаванд ва дар соатҳои гарми рўз қувваи барқ аз таблоҳои таблиғотӣ гирифта шавад. 
Бо назардошти пешгирии ҳар гуна ҳолатҳои садамавии вобаста ба гармо дар ҷойҳои алоҳидаи фурудгоҳ мошинҳои сӯхторнишонӣ ва ёрии таъҷилӣ дар ҳолати омодабош қарор доранд. Ҳамзамон фурудгоҳ бо Сарраёсати сўхторнишонии ВКД ва «Маркази наҷот»-и Кумитаи ҳолатҳои фавқулодаи ҷумҳурӣ алоқаи доимӣ барқарор намудааст.